A place where you need to follow for what happening in world cup

టార్గెట్ సూర్య… ఇస్రో నయా ప్లాన్ స్పేస్ పై భారీ ఆశలు

0 131

చంద్రయాన్ 3 సక్సెస్‌తో భారత అంతరిక్ష పరిశోధనా సంస్థ మరో ప్రయోగానికి సిద్ధమవుతోంది. సౌర వ్యవస్థకు మూలమైన సూర్యుడిని పరిశోధించడానికి సన్నద్ధమవుతోంది. ప్రస్తుతం శ్రీహరికోట రాకెట్ పోర్ట్‌లో  ఆదిత్య-ఎల్1 అంతరిక్ష నౌక తుది మెరుగులు దిద్దుకుంటోంది. పోలార్ శాటిలైట్ లాంచ్ వెహికల్ (పీఎస్‌ఎల్‌వీ) రాకెట్‌లో కరోనాగ్రఫీ ఉపగ్రహంగా ఆదిత్య-ఎల్1ని రోదసిలోకి పంపేందుకు  ఇస్రో సిద్ధంగా ఉంది. ఈ ప్రయోగం ఆగస్టు చివరి భాగంలో లేదా సెప్టెంబర్ ప్రారంభంలో జరగనుంది. సూర్యుడు, భూమి మధ్య మొదటి లాగ్రాంజ్ పాయింట్ L1 చుట్టూ ఉన్న హాలో కక్ష్యలో  ఆదిత్య-L1 వ్యోమనౌకను ఉంచడమే ఈ మిషన్ ప్రాథమిక లక్ష్యం. గ్రహణాలు ఏర్పడినప్పుడు కూడా ఈ కక్ష్యలో ఆదిత్య నిరంతరాయంగా తిరుగుతూ ఉపగ్రహం సూర్యుడిని నిరంతరం గమనిస్తూ ఉంటుంది.

సూర్యుడిని దేవుడిగా భావిస్తూ సూర్యుడిపై ప్రయోగాలకు గుర్తుగా ఆదిత్య-L1 అని దీనికి పేరు పెట్టారు. ఇది ఖగోళంలో అద్భుతాల గురించి తెలుసుకోవడానికి, అవగాహన పెంచడానికి, అన్వేషణ కోసం ఉపయోగపడుతుంది. ఆదిత్య-L1 మిషన్‌తో పాటు 2024లో చేపట్టనున్న వీనస్ మిషన్‌పై ఇస్రో దృష్టి సారించింది. నక్షత్రాలు, ఆకాశాలు, అంతకు మించి చేరుకోవడం కోసం ఇస్రో చేస్తున్న ప్రయోగాలు చూస్తుంటే భారత్ భవిష్యత్‌లో చరిత్ర సృష్టించనుందని నిపుణులు భావిస్తున్నారు.విజయవంతమైన చంద్రయాన్-3 మిషన్ తర్వాత విజయోత్సవ వేడుకలో ఇస్రో ఛైర్మన్ సోమనాథ్ తదుపరి ప్రయోగాలపై ధీమా వ్యక్తం చేశారు. చంద్రయాన్-3 మిషన్ విజయం అంగారక గ్రహంపైకి వెళ్లడం, అక్కడ చారిత్రాత్మకంగా ల్యాండింగ్ చేయాలనే ఆశయాలను కూడా ప్రేరేపించిందని సోమనాథ్ ప్రకటించారు.

భవిష్యత్తులో వీనస్, అంతకు మించి అన్వేషణలు జరిగే అవకాశం ఉందన్నారు. కఠిన మైన సవాళ్లతో కూడుకున్న చంద్రుడి దక్షిణ ధృవంపై ల్యాండింగ్ అవడం ద్వారా సమస్యాత్మకమైన రెడ్ ప్లానెట్, మార్స్‌ పైకి వ్యోమగాములను పంపేందుకు దోహదం చేస్తుందన్నారు.   ఆదిత్య మిషన్ ద్వారా సూర్యుడిపై ప్రయోగాలు చేసేందుకు ఇస్రో సిద్ధమవుతోందని  ఛైర్మన్ సోమనాథ్ తెలిపారు. ఆదిత్య మిషన్‌ సెప్టెంబర్‌లో ప్రయోగానికి సిద్ధమవుతోంది. గగన్‌యాన్ పనులు కొనసాగుతున్నాయని అన్నారు.సెప్టెంబర్ లేదా అక్టోబర్ చివరి నాటికి ఒక మిషన్‌ పూర్తి చేస్తామన్నారు. 2025 నాటికి మొదటి మానవ సహిత మిషన్ చేపట్టేందుకు అనేక పరీక్షలు చేపట్టనున్నట్లు చెప్పారు. ఇందుకోసం క్రూ మాడ్యూల్, క్రూ ఎస్కేప్ సామర్థ్యాన్ని పరీక్షించనున్నట్లు చెప్పారు.

ఇండియా స్పేస్ ఎకానమీపై దృష్టి
చంద్రయాన్-3 విజయంతో ఇండియా స్పేస్ ఎకానమీపై దృష్టి సారించింది.  2025 నాటికికి 13 బిలియన్ డాలర్లు చేరుకుంటుందని అంచనా వేస్తోంది.  చంద్రయాన్-3 భారత అంతరిక్ష పరిశోధనా సంస్థ ఇస్రో చంద్రుడిపై మూడో ప్రయోగం. చంద్రుని ఉపరితలంపై సాఫ్ట్ ల్యాండింగ్ సాధించిన నాలుగో దేశంగా అవతరించింది. యునైటెడ్ స్టేట్స్, రష్యా, చైనాలు భారత్ కంటే ముందున్నాయి. ఈ క్రమంలో క్రాష్ ల్యాండింగ్‌లు, ఫెయిల్ అయిన వాటిని లెక్కలోకి తీసుకోరు.  చంద్రయాన్-3 ల్యాండ్ తర్వాత, ల్యాండర్ విక్రమ్ నుంచి రోవర్ ప్రజ్ఞాన్ చంద్రుని ఉపరితలంపై తిరుగుతూ పని మొదలు పెట్టింది. డేటాను సేకరించడం స్టార్ట్ చేసింది. ఈ మిషన్ విజయవంతం అవడంతో భారతదేశం అంతరిక్ష రేసులో గొప్ప పురోగతి సాధించినట్లు అయ్యింది.

అంతే కాకుండా దేశ ఆర్థిక వ్యవస్థకు పెద్ద ప్రోత్సాహాన్ని అందిస్తుందని భావిస్తున్నారు.అంతరిక్ష ప్రయోగాల ప్రయోజనాలను ప్రపంచం ఇప్పటికే చూస్తోంది. ఇంటర్నేషనల్ స్పేస్ స్టేషన్‌లో వాటర్ రీసైక్లింగ్‌తో శుభ్రమైన తాగునీటిని పొందడం, స్టార్‌లింక్ అందించిన గ్లోబల్ ఇంటర్నెట్ యాక్సెస్, సౌర విద్యుత్ ఉత్పత్తి, ఆరోగ్య సాంకేతికతలలో పురోగతి ప్రయోజనాలు నేరుగా చూస్తోంది. శాటిలైట్ ఇమేజింగ్, పొజిషనింగ్, నావిగేషన్ గ్లోబల్ డేటా కోసం పెరుగుతున్న డిమాండ్‌తో ప్రపంచం ఇప్పటికే అంతరిక్ష ఆర్థిక వ్యవస్థ వృద్ధి దశలో ఉందని  నివేదికలు సూచిస్తున్నాయి. 2013 నుంచి ప్రైవేట్ ఈక్విటీ ద్వారా 1,791 కంపెనీలకు  272 బిలియన్ల డాలర్లు ఎలా సమీకరించారో డెలాయిట్ నివేదిక ప్రముఖంగా ప్రచురించింది. వార్షిక నివేదికలో స్పేస్ ఫౌండేషన్ 2023 రెండవ త్రైమాసికంలో ప్రపంచ అంతరిక్ష ఆర్థిక వ్యవస్థ ఇప్పటికే 546 బిలియన్ల డాలర్లకు చేరుకుందని పేర్కొంది. గత పదేళ్లతో పోలిస్తే 91 శాతం పెరిగింది. భారతదేశ అంతరిక్ష ఆర్థిక వ్యవస్థ 2025 నాటికి 13 బిలియన్‌ డాలర్లకు చేరుకుంటుందని అంచనా. ఆస్ట్రేలియన్ సివిల్ స్పేస్ స్ట్రాటజీ 2019-2028 ప్రకారం12 బిలియన్ ఆస్ట్రేలియన్ డాలర్‌కు పెంచాలని లక్ష్యంగా పెట్టుకుంది.

అలాగే 2030 నాటికి అదనంగా 20,000 ఉద్యోగాలను సృష్టించడం లక్ష్యంగా పెట్టుకుంది. 50 ఏళ్ల క్రితం అపోలో ద్వారా మానవులను చంద్రునిపైకి తీసుకెళ్లినప్పుడు  NASA విజయవంతంగా భారీ మొత్తంలో డబ్బును ఆర్జించిన విషయం చాలా మంది మరచిపోయారు. బిలియన్ల సంవత్సరాల ఉల్కల పేలుళ్ల కారణంగా చంద్రుని ఉపరితలం చాలా మృదువుగా ఉందని, దుమ్ము ధూళిగాతో నిండిపోయిందని, అంతరిక్ష నౌక ఉపరితలంలోకి ఊబిలో మునిగిపోతాయని చాలా మంది భావించారు. అయితే అదృష్టవశాత్తూ అది నిజం కాదని ప్రయోగాల ద్వారా నిరూపించారు.21వ శతాబ్దంలో సాంకేతికత కొత్త పుంతలు తొక్కుతున్నా అంతరిక్షయానం ఇబ్బందులు అలాగే ఉన్నాయి. మీ సిస్టమ్ స్థిరమైన కమ్యూనికేషన్‌లను నిర్వహించగలదా? అనేక రకాల తీవ్రమైన పరిస్థితులలో స్వయంప్రతిపత్తితో పనిచేయగలదా? అనే ప్రశ్నలు ఉత్పన్నమవుతున్నాయి.

కానీ చంద్రయాన్-1తో చంద్రుడిని చేరుకోవడానికి భారతదేశం చేసిన మొదటి ప్రయత్నం దాదాపు అన్ని మిషన్ లక్ష్యాలు, శాస్త్రీయ లక్ష్యాలలో విజయవంతమైంది. దీని ద్వారానే చంద్రుని ఉపరితలంపై నీటి సాక్ష్యాలను గుర్తించడం కూడా జరిగింది. కానీ 312 రోజుల తర్వాత అంతరిక్ష నౌక ఇస్రోతో సంబంధాన్ని కోల్పోయింది.అయినప్పటికీ, నేషనల్ స్పేస్ సొసైటీ, అమెరికన్ ఇన్‌స్టిట్యూట్ ఆఫ్ ఏరోనాటిక్స్ అండ్ ఆస్ట్రోనాటిక్స్ నుంచి అవార్డులు పొందిన చంద్రయాన్-1ని చాలా మంది అసాధారణ విజయంగా పరిగణిస్తారు. అయినా పట్టు వదలని భారత్ 6 సెప్టెంబర్ 2019న, చంద్రయాన్-2 ప్రయోగించింది. ప్రజ్ఞాన్ రోవర్‌తో కలిసి విక్రమ్ ల్యాండర్‌తో చంద్రుడిని చేరుకోవడానికి ప్రయత్నించింది. చంద్రుని ఉపరితలం నుంచి 2.1కిమీ ఎత్తు నుంచి ల్యాండర్ కూలిపోయింది.

11 ఏప్రిల్ 2019న ఇజ్రాయెలీ బెరెషీట్ ల్యాండర్ ఉత్తర భాగంలో మృదువైన ల్యాండింగ్‌కు ప్రయత్నించింది. అయితే బ్రేకింగ్ ప్రక్రియలో ఒక ఇనర్షియల్ మెజర్‌మెంట్ యూనిట్ గైరోస్కోప్ విఫలమైంది. ఫలితంగా ఉపరితలం నుంచి 2.1 కిలో మీటర్ల ఎత్తులో కమ్యూనికేషన్‌ తెగిపోయింది. ఇది విజయవంతమై ఉంటే, బెరెషీట్ మొదటి విజయవంతమైన ప్రైవేట్-నిధుల మిషన్, చంద్రునిపై ఇజ్రాయెల్ మొదటి మిషన్ అయ్యేది.25 ఏప్రిల్ 2023న, ప్రైవేట్‌గా నిధులు సమకూర్చిన ఐస్పేస్ యునైటెడ్  జపనీస్ కంపెనీ అరబ్ ఎమిరేట్స్‌కు చెందిన రషీద్ రోవర్‌ను సొంత హకుటో ఆర్ ల్యాండర్‌ ద్వారా సాఫ్ట్ ల్యాండింగ్ చేయడానికి ప్రయత్నించింది.  చివరి నిమిషంలో ల్యాండింగ్ జోన్ మార్చడంతో అంతరిక్ష నౌక చంద్ర ఉపరితలానికి  5 కి.మీ నుంచి పడిపోయి క్రాస్ ల్యాండింగ్ అయ్యింది.

చంద్రయాన్-2, బెరెషీట్, హకుటో-ఆర్ వైఫల్యాలు ఆధునిక అంతరిక్షయానం యొక్క ఇబ్బందులను, అధునాతన సెన్సింగ్, ఇంజనీరింగ్‌లో మార్పుల ప్రాముఖ్యతను తెలిపాయి. చంద్రయాన్-2 నుంచి నేర్చుకున్న పాఠాలతో చంద్రయాన్-3ని మరింత పటిష్టంగా రూపొందించారు. చంద్రయాన్-3లో నాలుగు ఇంజన్లను సర్దుబాటు చేయగలిగిన థొరెటల్,  స్లేవ్, లేజర్ డాప్లర్ వెలోసిమీటర్ ఉంటాయి. అవి చంద్రయాన్-2లా కాకుండా అన్ని దశలలో ల్యాండర్‌ను నియంత్రించగలవు.విక్రమ్ ల్యాండర్ చంద్రుని ఉపరితలంపై ఇప్పటికే చాలా సున్నితమైన పరికరాలను తీసుకువెళ్లింది. ఇందులో మూన్‌క్వేక్‌లను గుర్తించే సీస్మోమీటర్, చంద్రుని ఉపరితలం వద్ద సూర్యుడి నుంచి చార్జ్డ్ కణాల ప్రవర్తనను కొలవడానికి లాంగ్‌ ముయిర్ ప్లాస్మా ప్రోబ్, నాసా అందించిన రెట్రో రిఫ్లెక్టర్ ఉన్నాయి. చంద్రుడిపై ఉష్ణోగ్రతలను కొలిచేందుకు ఒక థర్మల్ ప్రోబ్ భూమిలోకి 10 సెంటీమీటర్ల లోతుకు దింపుతుంది. అది అక్కడ రోజంతా ఉష్ణోగ్రతలను నమోదు చేస్తుంది. అంతేకాదు చంద్రుని ధ్రువాల వద్ద నీటి మంచు కోసం గాలిస్తుంది.

Leave A Reply

Your email address will not be published.