- హిందూ సంప్రదాయాలకు ప్రతీక
- హాజరైన నాలుగు రాష్ట్రాల గవర్నర్లు, కేంద్ర, రాష్ట్ర మంత్రులు
నగరంలోని ఎగ్జిబిషన్ గ్రౌండ్ లో `అలయ్…బలయ్’ కార్యక్రమం బుధవారం అట్టహాసంగా జరిగింది. దీనికి వివిధ రాష్ట్రాల గవర్నర్లు, పలువురు కేంద్ర, రాష్ట్ర మంత్రులు, వివిధ పార్టీల నేతలు హాజరయ్యారు. బీజేపీ నాయకురాలు బండారు విజయలక్ష్మి ఆధ్వర్యంలో జరిగిన ఈ కార్యక్రమంలో కేంద్ర మంత్రులు మీనాక్షి లేఖి, మురళీధరన్, కిషన్రెడ్డి, హిమాచల్ప్రదేశ్ గవర్నర్ బండారు దత్తాత్రేయ, మిజోరాం గవర్నర్ హరిబాబు, గుజరాత్ గవర్నర్ ఆచార్య దేవ్ రాత్, జార్ఖండ్ గవర్నర్ రాధాకిషన్, కేంద్ర రైల్వే శాఖ సహాయ మంత్రి రావు సాహెబ్ పాటిల్ దన్వే, రాజ్యసభ సభ్యుడు లక్ష్మణ్, ఎంపీ , సినీ రచయిత విజయేంద్ర ప్రసాద్, బీఆర్ఎస్ ఎంపీ కె కేశవ రావు, మాజీ ఎంపీలు వివేక్, బూర నర్సయ్య గౌడ్, మాజీ గవర్నర్ విద్యా సాగర్ రావు, కాంగ్రెస్ సీనియర్ నేత జానారెడ్డి, రాష్ట్ర మంత్రి తలసాని శ్రీనివాస్ యాదవ్ తదితర ప్రముఖులు హాజరయ్యారు.
ఈ సందర్భంగా వారు మాట్లాడుతూ, హిందూ సంప్రదాయాలకు ప్రతీక అలయ్ బలయ్ కార్యక్రమం అని ప్రముఖులు వ్యాఖ్యానించారు. దసరా తర్వాత గత 17 ఏండ్లుగా హిందూ సంప్రదాయం ప్రకారం ఈ కార్యక్రమం జరుగుతుందన్నారు. అలయ్– బలయ్ లేకుండా హైదరాబాద్ లో దసరా పూర్తి అయినట్టు కాదన్నారు. తెలంగాణ వంటకాలను దత్తాత్రేయ గత 17 ఏండ్లుగా అందిస్తున్నారని పేర్కొన్నారు. దసరా పేరుతో అందరిని ఒకే వేదికపై తీసుకరావడమే ఈ కార్యక్రమం ముఖ్య ఉద్దేశ్యమన్నారు. రాజకీయాలకు, పార్టీలకు, మతాలకు అతీతంగా అందరూ రావడం ఆనందంగా ఉందన్నారు. తెలంగాణ ఉద్యమంలోనూ ఈ కార్యక్రమం కూడా అందరిని ఏకం చేసిందన్నారు. అలయ్–బలయ్ అంటే గుర్తు వచ్చేది దత్తాత్రేయ’ అని అన్నారు. ప్రస్తుతం ఈ కార్యక్రమాన్ని దత్తాత్రేయ కూతురు విజయలక్ష్మీ ముందుకు తీసుకెళుతుండడం పట్ల వారు హర్షం వ్యక్తం చేశారు. ఇదే విధంగా భవిష్యత్తులోనూ కొనసాగించాలని ఆకాంక్షించారు.
