టీడీపీ అధినేత చంద్రబాబు, జనసేనాని పవన్ కల్యాణ్ గన్నవరం విమానాశ్రయంలో ప్రధాని నరేంద్ర మోదీకి స్వయంగా స్వాగతం పలికారు. అనంతరం, ప్రధాని మోదీ, చంద్రబాబు ఒకే వాహనంలో కేసరపల్లి ఐటీ పార్కు వద్దకు బయల్దేరారు. ఈ ఉదయం 11.27 గంటలకు చంద్రబాబు ముఖ్యమంత్రిగా ప్రమాణస్వీకారం చేస్తుండడం తెలిసిందే. మోదీ, చంద్రబాబు, పవన్ కాసేపట్లో వేదికపైకి చేరుకోనున్నారు.
ఈ కార్యక్రమానికి ప్రధాని నరేంద్ర మోదీ ముఖ్య అతిథిగా హాజరవుతున్నారు. ఇప్పటికే వేదికపైకి అమిత్ షా, జేపీ నడ్డా, నితిన్ గడ్కరీ వంటి పలువురు జాతీయ స్థాయి నేతలు, మెగాస్టార్ చిరంజీవి, రజనీకాంత్ తదితర ఇతర రంగాల ప్రముఖలు చేరుకున్నారు.
